وصلتني مجموعة من الأسئلة عن الكيراتين بنات بتسأل عن أهميته؟
وعن طبيعة الشعر اللي بتحتاج للكيراتين؟
وأسئلة تانية هانجاوب عليها كلها
يالا بينا...
يا ترى الكيراتين مفيد للشعر الناعم ولا هو للشعر المجعد والهايش فقط؟
صاحبة الشعر الناعم ممكن يكون شعرها هايش أو مقصف بدرجة بسيطة جداً بالنسبة لغيرها، ولا تعاني من أية مشاكل، لكن ممكن تعمل كيراتين لو عاوزة تخلي شعرها كثيف ومتجانس لكن المشاكل الفعلية بتكون في الشعر المجعد.
والكيراتين لا يفرد الشعر فرد كامل، ولكنه يجعل فيه تموّجات واسعة وبيخلّي شكله لطيف.
الكيراتين الممتد المفعول يستخدم لفرد الشعر أم لعلاجه؟
كيراتين الفرد والكيراتين المعالج بيرفعوا نسبة الكيراتين في الشعر بنسبة 80% يعني بيحقق النتيجتين الفرد والعلاج وبالمناسبة 90% من مكوّنات الشعر الطبيعية "كيراتين".
يعني إيه الكيراتين؟
فكرة الكيراتين جت من إن مكوّنات الشعر الطبيعي يعني 90% منه كيراتين وهذه النسبة تقل مع سوء استخدام السيدة لشعرها من فرد وصبغة أو من شامبوهات غير مناسبة لشعرها، وكمان بسبب العوامل الوراثية فتقل النسبة لتصبح 35% ويبدأ الشعر يهيش ويتساقط، وعلشان كده فكرت فيه شركة برازيلية اسمها" تانجرا" هي اللي اخترعت الكيراتين وبدأت تجري عليه تجارب كتيرة جداً، وبالفعل نجحت في رفع نسبة الكيراتين في الشعر إلى 80% من أول جلسة.
صبغ الشعر الأول ولا عمل الكيراتين؟
أهم شيء اختيار نوع الصبغة الجيد وغير كده فلا توجد أي موانع من عمل الكيراتين مع الصبغة، وبنبدأ بالصبغة الأول وبعد كده بنغسل الشعر كويس جداً وبعد كده نضع الكيراتين على الشعر.
إيه رأيك في الحنة؟
أنا مش باستخدمها، ولكن يوجد من يحب الحنة والفكرة إن الحنة لم تعد كما سبق، يعني النهارده بتلاقي الحنة في أكياس صغيرة لا تمت للحنة الطبيعية بصلة.
إيه خطورتها على الشعر؟
أولاً هي اسمها صبغة حجر ولو وضعت على الشعر تجعل الشعر أسود مزرق ومش بنقدر نفتحه ولو حتى درجة واحدة ولازم علشان نفتحه نستخدم بودرة تفتيح ودي مضرة للشعر جداً.
ده يعني إن خطورتها في قوة لونها ولا فيه أسباب تانية؟
المواد الكيميائية اللي موجودة في الصبغة واللي بتؤذي الشعر جداً، بتكون موجودة كمان في أكياس الحنة اللي موجودة في السوق دلوقتي.
وبالنسبة للصبغة السوداء؟
يمكن استخدامها بس اللون الأسود عموماً بيكون صعب جداً في تغييره وتفتيحه.
